ସରକାରୀ ପଲିଟେକ୍ନିକ୍, ଅନୁଗୋଳର ମେକାନିକାଲ୍ ଇଞ୍ଜିନିୟରିଂ (ଯାନ୍ତ୍ରିକ ଅଭିଯାନ୍ତ୍ରିକୀ) ବିଭାଗ ପକ୍ଷରୁ ଆସନ୍ତା ନଭେମ୍ବର ୨୫ ରୁ ନଭେମ୍ବର ୨୭, ୨୦୨୫ ପର୍ଯ୍ୟନ୍ତ ତିନି ଦିନିଆ “ସ୍ମାର୍ଟ ମାନୁଫାକ୍ଚରିଂ” (Smart Manufacturing) କର୍ମଶାଳାର ଆୟୋଜନ କରାଯାଇଛି। AICTE-VAANI ୨୦୨୫-୨୬ ଆନୁକୂଲ୍ୟରେ ଅନୁଷ୍ଠିତ ହେବାକୁ ଥିବା ଏହି କର୍ମଶାଳାର ମୂଳ ଲକ୍ଷ୍ୟ ହେଉଛି ଆଞ୍ଚଳିକ ଭାଷାରେ ଶିଳ୍ପ କ୍ଷେତ୍ରର ନୂତନ ଜ୍ଞାନକୌଶଳ ବିଷୟରେ ଆଲୋଚନା କରି ଶିକ୍ଷାନୁଷ୍ଠାନ ଏବଂ ଶିଳ୍ପ ମଧ୍ୟରେ ଥିବା ବ୍ୟବଧାନକୁ ଦୂର କରିବା।
ଏହି କର୍ମଶାଳା ଅଂଶଗ୍ରହଣକାରୀମାନଙ୍କୁ ସ୍ମାର୍ଟ ମାନୁଫାକ୍ଚରିଂର ନୀତି ଏବଂ ‘ଇଣ୍ଡଷ୍ଟ୍ରି ୪.୦’ (Industry 4.0) ର ମୁଖ୍ୟ ବିଷୟବସ୍ତୁ ଉପରେ ଗଭୀର ଜ୍ଞାନ ଆହରଣ କରିବାର ସୁଯୋଗ ପ୍ରଦାନ କରିବ। ଏହା ଔଦ୍ୟୋଗିକ ସ୍ୱୟଂଚାଳିତକରଣ (Industrial Automation) କ୍ଷେତ୍ରରେ ଗବେଷଣା ଏବଂ ନୂତନ ଉଦ୍ଭାବନ ପାଇଁ ଅଂଶଗ୍ରହଣକାରୀମାନଙ୍କୁ ଉତ୍ସାହିତ କରିବ ବୋଲି ଆଶା କରାଯାଉଛି।
ସରକାରୀ ପଲିଟେକ୍ନିକ୍, ଅନୁଗୋଳର ଅଧ୍ୟକ୍ଷ ଶ୍ରୀ ଲକ୍ଷ୍ମୀକାନ୍ତ ନାୟକଙ୍କ ମାର୍ଗଦର୍ଶନରେ ଆୟୋଜିତ ଏହି କର୍ମଶାଳାକୁ ମେକାନିକାଲ୍ ବିଭାଗର ବରିଷ୍ଠ ଅଧ୍ୟାପିକା ଶ୍ରୀମତୀ ମୋନାଲିସା ବେହେରା ଏବଂ ଅଧ୍ୟାପିକା ଶ୍ରୀମତୀ ଶୁଭାଙ୍ଗୀ ମିଶ୍ର ସଂଯୋଜନା ତଥା ପରିଚାଳନା କରୁଛନ୍ତି।
ଏହି କାର୍ଯ୍ୟକ୍ରମର ଅଧିବେଶନଗୁଡିକ ଉଭୟ ଇଂରାଜୀ ଏବଂ ଓଡ଼ିଆ ଭାଷାରେ ଅନୁଷ୍ଠିତ ହେବ, ଯାହାଦ୍ୱାରା ବିଭିନ୍ନ ବର୍ଗର ଅଂଶଗ୍ରହଣକାରୀମାନେ ଆଲୋଚନାରୁ ଉପକୃତ ହୋଇପାରିବେ।