ପ୍ରଧାନମନ୍ତ୍ରୀଙ୍କ ଆହ୍ୱାନରେ ମେଦ ବହୁଳତା ବିରୋଧୀ ଲଢ଼େଇରେ ସାମିଲ ହେଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ
• ନିଜର ଖାଦ୍ୟ ପଦ୍ଧତିରୁ ୧୦ ପ୍ରତିଶତ ଖାଇବା ତେଲ କମ କରିବା ପାଇଁ ନେଲେ ନିଷ୍ପତି
• ନିଜର ସହଯୋଗୀ, ଆତ୍ମୀୟ ଓ ପରିବାରର ଅନ୍ୟୂନ ୧୦ ଜଣଙ୍କୁ ସଚେତନ କରାଇବା ପାଇଁ ଦେଲେ ପରାମର୍ଶ
• ପରୀକ୍ଷା ପେ ଚର୍ଚ୍ଚା – ୨୦୨୫ ଉପରେ ଆଲୋକପାତ କରିଥିବାରୁ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଦେଲେ
ଅନୁଗୋଳ (୨୩/୦୨ /୨୦୨୫) – କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ରବିବାର ଅନୁଗୋଳ ଠାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ୧୧୯ତମ ମନ୍ କୀ ବାତ୍ କାର୍ଯ୍ୟକ୍ରମକୁ କାର୍ଯ୍ୟକର୍ତ୍ତାମାନଙ୍କ ଗହଣରେ ଶୁଣିଛନ୍ତି । ଏହି ଅବସରରେ ଶ୍ରୀ ପ୍ରଧାନ ପ୍ରଧାନମନ୍ତ୍ରୀ ମୋଦୀଙ୍କ ଆହ୍ୱାନ କ୍ରମେ ମେଦ ବହୁଳତା ବିରୋଧୀ ଲଢ଼େଇରେ ଜନଆନ୍ଦୋଳନରେ ସାମିଲ ହୋଇ ନିଜର ଖାଦ୍ୟ ପଦ୍ଧତିରୁ ୧୦ ପ୍ରତିଶତ ଖାଇବା ତେଲ କମ କରିବା ପାଇଁ ନିଷ୍ପତି ନେଇଛନ୍ତି ।
କେନ୍ଦ୍ରମନ୍ତ୍ରୀ କହିଛନ୍ତି ଯେ ପ୍ରଧାନମନ୍ତ୍ରୀ ମନ କୀ ବାତ୍ କାର୍ଯ୍ୟକ୍ରମକୁ ଏକ ଅଭିନବ ଅନୁଷ୍ଠାନରେ ପରିଣତ କରିଛନ୍ତି । ପ୍ରଧାନମନ୍ତ୍ରୀଙ୍କ ସକାରାତ୍ମକ ଆଲୋଚନା ଭାରତର ସାମୂହିକ ଶକ୍ତିକୁ ପ୍ରତିଫଳିତ କରୁଛି । ଆଜିର କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ଜନସାଧାରଣ ବିଶେଷ ଭାବରେ ଯୁବ ସମାଜକୁ ନିଜ ଖାଦ୍ୟ ପ୍ରଣାଳୀରେ ୧୦ ପ୍ରତିଶତ ଖାଇବା ତେଲ କମ କରିବା ପାଇଁ ପରାମର୍ଶ ଦେଇଛନ୍ତି । ମୁଁ ମଧ୍ୟ ଏହି ଜନଆନ୍ଦୋଳନରେ ସାମିଲ ହେଉଛି । ଆମେ ସମସ୍ତେ ପ୍ରଧାନମନ୍ତ୍ରୀଙ୍କ ଆହ୍ୱାନ କ୍ରମେ ଏହି ଜନଆନ୍ଦୋଳନରେ ସାମିଲ ହୋଇ ଆମର ଖାଦ୍ୟ ପଦ୍ଧତିରେ ୧୦ ପ୍ରତିଶତ ତେଲ କମ କରିବା ଏବଂ ଅନ୍ୟମାନଙ୍କୁ ମଧ୍ୟ ଏ ବିଷୟରେ ସଚେତନ କରାଇବା । ଅନ୍ତତଃ ନିଜର ସହଯୋଗୀ, ଆତ୍ମୀୟ ଓ ପରିବାରର ୧୦ ଜଣଙ୍କୁ ଏହି ବିଷୟରେ ସଚେତନ କରାଇବା ପାଇଁ ଶ୍ରୀ ପ୍ରଧାନ ପରାମର୍ଶ ଦେଇଛନ୍ତି ।
ଦେଶର ବୈଜ୍ଞାନିକଙ୍କ କ୍ଷମତା, ଅନ୍ତରୀକ୍ଷ କ୍ଷେତ୍ରରେ ଇସ୍ରୋର ସଫଳତା, ନାରୀଶକ୍ତି, ଭାରତର ଡିପଟେକ୍ ଏଆଇ ମିଶନ, ଖେଲୋ ଇଣ୍ଡିଆ ସହ ଯୁବବର୍ଗଙ୍କୁ ସୁସ୍ଥ ରହିବାର ମନ୍ତ୍ର ଦେଇଛନ୍ତି । ବନ୍ୟପ୍ରାଣୀଙ୍କ ସୁରକ୍ଷା ଦିଗରେ ପ୍ରଧାନମନ୍ତ୍ରୀ ଦେଇଥିବା ଉଦାହରଣ ଏବଂ ଅନ୍ୟାନ୍ୟ ଉପାଦେୟ ପରାମର୍ଶ ଜନସାଧାରଣଙ୍କୁ ଅନୁପ୍ରାଣିତ କରିଛି । ପ୍ରଧାନମନ୍ତ୍ରୀ ପରୀକ୍ଷା ପେ ଚର୍ଚ୍ଚା – ୨୦୨୫ ଉପରେ ଆଲୋକପାତ କରିଥିବାରୁ ତାଙ୍କ ନିକଟରେ କୃତଜ୍ଞତା ଜ୍ଞାପନ କରିଛନ୍ତି କେନ୍ଦ୍ରମନ୍ତ୍ରୀ । ଚଳିତ ବର୍ଷର ସଂସ୍କରଣରେ ପରୀକ୍ଷା ସହ ସ୍ୱାସ୍ଥ୍ୟ, ବୈଷୟିକ ଜ୍ଞାନକୌଶଳ, ଏଆଇ ଏବଂ ଛାତ୍ରଛାତ୍ରୀଙ୍କ ସାମଗ୍ରିକ ବିକାଶ ଉପରେ ଆଲୋଚନା ହୋଇଛି । ପ୍ରଧାନମନ୍ତ୍ରୀଙ୍କ ବାର୍ତ୍ତା ଏଗଜାମ୍ ଓ୍ୱାରିୟର୍ସ ଙ୍କୁ ଚାପ ମୁକ୍ତ କରାଇବା ସହ ଆତ୍ମବିଶ୍ୱାସ ଜାଗ୍ରତ କରାଇବ । ଏହାବ୍ୟତୀତ ମହିଳା ନେତୃତ୍ୱକାରୀଙ୍କୁ ନମୋ ଆପରେ ଯୋଡିହେବା ପାଇଁ ସେ ଅପିଲ୍ କରିଛନ୍ତି ।
ଉକ୍ତ କାର୍ଯ୍ୟକ୍ରମ ରେ ଢେଙ୍କାନାଳ ସାଂସଦ ରୁଦ୍ର ନାରାୟଣ ପାଣି, ବିଧାୟକ ସୀମାରାଣୀ ନାୟକ, ପ୍ରତାପ ଚନ୍ଦ୍ର ପ୍ରଧାନ, ଅଶୋକ ମହାନ୍ତି ଓ ଅଗସ୍ତି ବେହେରା, ଜିଲ୍ଲାପାଳ ଅବଦୁଲ ଏମ ଅଖତାର, ଏସପି ରାହୁଲ ଜେନ, ଜିଲ୍ଲା ସଭାପତି ଯଯାତି ପଟ୍ଟନାୟକ, ପ୍ରାକ୍ତନ ବିଧାୟକ ରମେଶ ସାଏ, ଦିଲେଶ୍ଵର ପ୍ରଧାନ,ଜୋନାଲ ମିଡ଼ିଆ ସେଲ ସଂଯୋଜକ ପର୍ଶୁରାମ ବାରିକ ଙ୍କ ସମେତ ଶତାଧିକ କାର୍ଯ୍ୟକର୍ତା ଓ ସାଧାରଣ ଜନତା ଉପସ୍ଥିତ ଥିଲେ |