ଜିଲ୍ଲାରେ ଅନେକ ସ୍ୱେଚ୍ଛାସେବୀ ସଂଗଠନ ଏହି ଦୁଇ ପିଲାଙ୍କ ଉପରେ କାହାରି ନଜର ପଢୁନାହିଁ ବଡ଼ ଦୁଃଖଦ ଘଟଣା
ଅନୁଗୋଳ : ରୋଗରେ ପଡି ବାପା ଚାଲିଗଲେ ଆର ପାରିକୁ । ବାପା ଚାଲିଯିବା ପରେ ପରିବାର ଚଳାଇବା ମା ପକ୍ଷରେ ସମ୍ଭବ ହେଲା ନାହିଁ । ତେଣୁ ସେ ମଧ୍ୟ କେଉଁଆଡେ ଚାଲିଗଲେ । ଘରେ ରହିଗେଲ ଦୁଇ ଭାଇ ବାପୁନ ଓ ସିପୁନ । ଜଣଙ୍କ ବୟସ ଏବେ ୧୨ ଓ ଜଣଙ୍କର ୮ । କିନ୍ତୁ ଦୈବାତ ୬ ବର୍ଷ ତଳେ ଦୁଇ ବାଳକଙ୍କ ବାପା ବାବୁଲି ବେହେରାଙ୍କ ମୃତୁ୍ୟ ଘଟିଲା । ଏହାପରେ ମା ରଞ୍ଜୁ ବେହେରା କେଉଁଆଡେ ଛାଡି ଚାଲିଗଲା । ମା ଛାଡି ଚାଲିଯିବା ବେଳେ ବାପୁନକୁ ହୋଇଥିଲା ୬ ବର୍ଷ ଓ ସିପୁନକୁ ହୋଇଥିଲା ମାତ୍ର ଦୁଇ ବର୍ଷ । ଦୁଇ ଭାଇ ଅନାଥ ହୋଇଗଲେ । ମାଗି ଯାଚି ବଞ୍ଚିବାକୁ ଲାଗିଲେ । ଏବେ ଏକ କୁଡିଆ ଘରେ ଦୁଇ ଭାଇ ରହୁଛନ୍ତି । ଏହିପରି ଦୃଶ୍ୟ ଦେଖିବାକୁ ମିଳିଛି ଶିଳ୍ପ ସମୃଦ୍ଧ ଅନୁଗୋଳ ଜିଲ୍ଲାର ବଅଁରପାଳ ବ୍ଲକ ଫୁଲପଡ଼ା ପଞ୍ଚାୟତର କମାର ସାହିରେ । ଏବେ ପ୍ରଶ୍ନ ଉଠିଛି ସେମାନଙ୍କୁ ପାଠ ପଢାଇବ କିଏ, ସେମାନେ ଦୁନିଆ ଦେଖିବେ କେମିତି ତାହା ବୁଝିବା ପାଇଁ କେହି ନାହାଁନ୍ତି । ଅନୁଗୋଳ ଜିଲ୍ଲାରେ ଅନେକ ସ୍ୱେଚ୍ଛାସେବୀ ସଂଗଠନ ରହିଥିବା ବେଳେ ଏହି ଦୁଇ ପିଲାଙ୍କ ଉପରେ କାହାରି ନଜର ପଢୁନାହିଁ ବଡ଼ ଦୁଃଖଦ ଘଟଣା । ସେହିପରି ପ୍ରଶାସନର ମଧ୍ୟ ନଜର ଏହି ଦୁଇ ନିଷ୍ପାପ ଶିଶୁ ଉପରେ ଅଦ୍ୟାବଧି ପଡି ପାରିନାହିଁ । ଫଳରେ ଏକ କୁଡ଼ିଆ ମଧ୍ୟରେ ଅଭିସପ୍ତ ଜୀବନ ବିତାଉଛନ୍ତି ଦୁଇ ଭାଇ ବାପୁନ ଓ ସିପୁନ । ଖବର ନେବାରୁ ଜଣାପଡିଛି କମାର ପରିବାରର ଦୁଇ ପିଲା ବାପୁନ ଓ ସିପୁନ । ବାପା ବାବୁଲି କମାର କାମ କରି ପରିବାର ପ୍ରତିପୋଷଣ କରୁଥିଲେ । ହେଲେ ତାଙ୍କୁ ରୋଗ ହେବା ପରେ ସେ ଆରପାରିକୁ ଚାଲିଗଲେ । ଏହାପରେ ମା ରଞ୍ଜୁ ଦୁଇ ପିଲାଙ୍କୁ ଛାଡି କେଉଁଆଡେ ଚାଲିଗଲେ । କୁଡିଆ ଘରେ ପଡି ରହିଲେ ଦୁଇ ନିଷ୍ପାପ ଶିଶୁ । ଦୁଇଟି ଶିଶୁ କିପରି ବଢିବେ ଓ କିପରି ଦୁନିଆ ଦେଖିବେ ସେଥିପାଇଁ କେହି ରହିଲେ ନାହିଁ । ଜଣେ ସଂପର୍କୀୟ ଓ ସ୍ଥାନୀୟ ଲୋକେ ଯାହା ଗଣ୍ଡେ ଦିଅନ୍ତି ଦୁଇ ଭାଇ ଖାଆନ୍ତି । ହେଲେ ଓଳିଏ ଖାଇଲେ ଆର ଓଳିକୁ ଉପବାସ ରହିବାକୁ ପଡେ । ତେଣୁ ଦୁଇ ଶିଶୁଙ୍କୁ କୌଣସି ସରକାରୀ କି ବେସରକାରୀ ଅନୁଷ୍ଠାନ ସହଯୋଗର ହାତ ବଢାଇବା ପାଇଁ ଅଞ୍ଚଳବାସୀ ଦାବି କରିଛନ୍ତି ।