ଗୁରୁଙ୍କ ଦୀର୍ଘାୟୁ ପାଇଁ କିନ୍ନର ପଳାନ୍ତି ଏହି ବ୍ରତ
ଆଜି ହେଉଛି ପବିତ୍ର ସାବିତ୍ରୀ ବ୍ରତ । ଏହି ଦିନରେ ସ୍ଵାମୀଙ୍କ ଦୀର୍ଘାୟୁ କାମନା କରି ସଧବା ମାନେ ଏହି ବ୍ରତ ପାଳନ କରିଥାନ୍ତି । ତେବେ ମହିଳାଙ୍କ ଭଳି ଆଜି କିନ୍ନର ସମ୍ପ୍ରଦାୟ ମାନେ ସାବିତ୍ରୀ ବ୍ରତ ପାଳନ କରୁଛନ୍ତି । କିନ୍ନର ସମ୍ପ୍ରଦାୟ ଆଜିର ଦିନରେ ନିଜର ଗୁରୁଙ୍କ ଦୀର୍ଘାୟୁ ଏବଂ ଜଗତ କଲ୍ଯାଣ ପାଇଁ ଏହି ବ୍ରତ କରିଥାନ୍ତି ।
ଏହି କ୍ରମରେ ଅନୁଗୋଳ ଜିଲ୍ଲାର କିନ୍ନର ମାନେ ସାଧାରଣ ମହିଳା ମାନଙ୍କ ପରି ନୂତନ ପୋଷାକ ପରିଧାନ କରିବା ସହ ସଜେଇ ହୋଇ ଏକତ୍ରିତ ଭାବେ ଏହି ବ୍ରତକୁ ଶିମିଳିପଡା ଠାରେ ପାଳନ କରିଛନ୍ତି । ଆଜି ସକାଳୁ କିନ୍ନର ମାନେ ଆମ୍ବ, ପଣସ, ସପୁରୀ ଆଦି ବିଭିନ୍ନ ପ୍ରକାର ଫଳ ସହ ଶାଢୀ, ଚୁଡି, ସିନ୍ଦୁର ଆଦି ସାଙ୍ଗରେ ନେଇ ପହଁଚିଥିଲେ। ଶିମିଳିପଡା ପୋଖରୀ କୁଳରେ ଥିବା ଉଦ୍ୟାନ ର ଏକ ବରଗଛ ମୁଳରେ ପୂଜାର୍ଚ୍ଚନା କରିବା ସହ ବ୍ରତ ପାଳନ କରିଥିଲେ। ଏହା ପରେ ଗୁରୁଙ୍କ ପାଦ ଛୁଇଁ ଆଶୀର୍ବାଦ ନେବା ପରେ ପ୍ରସାଦ ସେବନ କରିଥାନ୍ତି । କିନ୍ନର ମାନେ ନିଜ ଘର ଛାଡି ବାହାରକୁ ଚାଲିଆସିଥିବାରୁ ନିଜ ଗୁରୁ ହିଁ ସେମାନଙ୍କ ପାଇଁ ବାପା, ମା, ସ୍ଵାମୀ ସବୁକିଛି । ତେଣୁ ତାଙ୍କ ପାଇଁ ବ୍ରତ ପାଳନ କରୁଥିବା ସେମାନେ କହିଛନ୍ତି। ଭାନୁପ୍ରିୟା, ପ୍ରିୟା, ପାର୍ବତୀ ପଦ୍ମିନୀ, ଫୁଇ, ସୁହାନି, କେଟି, ଚମ୍ପି ଙ୍କ ସହ ଅନ୍ୟ ବହୁ କିନ୍ନର ଏହି ବ୍ରତ ଧୁମଧାମର ସହ ପାଳନ କରିଥିଲେ।